Erlebnisferien in Seefeld 22. bis 29. Juli 2017

... uf de Kafi händ mir rächt lang müese warte. Aber mir händ ja schliesslich Ferie gha!!!

Nach de 11e hät eus de Chauffeur, wo guet und sicher gfahre isch, vor em Hotel Seespitz in Seefeld usglade. Er isch dänn no mit de andere Passagier nach Pertisau gfahre.

Bimene 1. Rundgang dur Seefeld sind mir alli begeisteret gsi, vo dem romantische bluemegschmückte Städtli mit unzählige Läde und Beizli. Nach eme feine Zmittag händ mir eusi schöne, grosse Zimmer im Hotel chöne bezieh. E chli Usruehe isch nötig gsi, dänn mir alli sind doch scho sit am 4.30 Uhr uf gsi. Im Hotel hät eus es italienisches Buffet zum Nachtesse erwartet. Nach em Znacht isch s'Flaniere i dene schöne Läde es Vergnüege gsi ... d'Nelly hät nach de 9e no e Jagge kauft!!!

Am Sunntig morge sind mir per Bus uf d'Wildmoosalm gfahre. E typischi Alp, wo d'Küeh no Hörner händ. S'Alp Restaurant wär uuuuuh gmüetlich gsi, aber mir händ ja erscht Zmorge gha und drum nöd scho wieder welle ichere. Plötzlich händ mir uf de Terrasse e luti Sirene ghört!!! Aber passiert isch nüt .... es hät nu frische Apfelstrudel gäh!!!

Z'Fuess sind mir dur schöni Wälder und Wiese ca. 2 Stund Richtig Mösern gloffe. Underwägs isch eus e ganz spezielli Beiz ufgfalle. De gschmackvolli Holzbau hät eus agmacht zum Ichere!! D'Gulaschsuppe isch dänn au lecker gsi. In Mösern händ mir nach längerem Sueche doch no de Wäg zu de Friedensglocke gfunde, die gröschti Glocke vo Tirol! Sie isch 10 Tonne schwer und hanget im Freie ufere Ahöchi. Jede Abig am 5i tuet sie lüte und so d'Friedensbotschaft übermittle. Ghört händ mir die Klänge nöd, aber allwäg isch das scho sehr imposant das Glüt us nächster Nöchi z'ghöre!!!

Im Hotel isch de beheizti Ussepool und de Whirlpool vo eus in Beschlag gno worde. Es Galadinner hät de schöni Tag beändet.

Am Mäntig am halbi nüni händ mir inere Gymnasikstund binere zackige Lehreri es neus Grät chöne usprobiere - en Smovey. Die halb Stund uf ere halbwegs deckte Terrasse isch ganz speziell gsi.

Wills grägnet het, händ mir beschlosse mit em Zug nach Innsbruck z'fahre go shoppe. Im Zug händ mir e ehner luti Diskussion gführt wäge eusne Handys. Ich ha nöd gwüsst wie me vom Hotel us telefoniert, Eini hät kei nöi Nummere chöne igäh, die Ander hät grüeft: "Ich gshes ja nöd?!" - Hoffentlich hät eus niemer zuegloset! Eusi Enkel hettet sich wahrschienlich gschämet für eus ....!

In Innsbruck häts natürlich wäg dem schlächte Wätter uuuuuh viel Lüt gha. Vier sind aber trotzdem go shoppe, aber mir sind z'Dritte wieder zrugg nach Seefeld fahre. Wil euses Hotel diräkt am Wildsee gläge isch, sind mir nach eme churze Spaziergang a de Kneip Stell gsi. So isch das herrliche Wassertrete fascht jede Abig uf em Programm gstande.

Am Ziestig häts wieder grägnet. So händ mir eus Zit gla für en usgiebige Zmorge. Euse Chällner de Czaba hät eus, und das jede Tag, jede Wunsch vo de Auge abgläse! Kafi und Milch hät er igschänkt und allne jede Morge es frisches Rührei bracht ...! Uf em Wuchemärkt, wo iheimischi Händler Arvechüsseli, Gwürz, gschnitzti Holzartikel, also tolli Sache (nöd so en Krims Krams), verkauft händ, sind mir doch einigi Euros los worde ...!

Mittwuch, es hät natürlich wieder grägnet! So sind mir mit em Bus nach Mittenwald gfahre. Es hübsches Städtli - natürlich wärs bi Sunneschi no schöner gsi. Aber e paar Ichäuf händ mir doch no tätiget ... Zrugg in Seefeld hät eus d'Lis im Golf Club für e Probelektion agmäldet. Wills aber in Seefeld grägnet hät, sind mir vom Hotel Chauffeur mit em Büssli uf d'Wildmoosalm gführt worde. Det het eus en Golflehrer de Abschlag am Schärme probiert z'zeige! Ja, Golf gseht so eifach us, aber wänn me so en Schläger i de Händ hät, oje oje !!!! Aber luschtig isch es gsi. Nach ere Stund sind mir vom Chauffeur wieder agholt worde.

Am Dunnstig sind mir bi Sunneschi losmarschiert. Eusi Wanderin isch am Wildsee verbi gange Richtig Reith. Im wunderschöne Wald händ eus unzähligi Eichhörnli mit ihrne Kapriole underhalte. De Wäg hät ame Wildpark verbi gführt. Mir händ natürlich die Hirsche gfüetteret. Ufeme schöne, aber steile Wäg, sind mir bald am Ziel im Restaurant Engelkopf acho. Schöni Blueme händ das gmüetliche Hus gschmückt. Nach eme chliene Imbiss sind mir uf em Heiwäg wieder a de Kneipp Stell verbi cho. Alli, sogar d'Nelly, händ de Plausch gha a dem iiiischalte Wasser!

Nach em Znacht händ mir es tolls Konzert im Kurpark gnosse, gspielt vo de Bürgermusikkapelle. Mir sind no nid ganz im Hotel gsi, häts scho wieder grägnet!

Am Friitig (nei es het nid grägnet) sind mir per Taxi a d'Talstation vo de Rosshüttebahn gfahre. Mit de Standseilbahn sind mir dänn uf 1760 m Höchi acho. D'Ussicht isch dänn no perfekt gsi. En Rundwäg, wo usgschilderet gsi isch, hät eus aber nöd optimal dunkt?! Es schmals, vo Wurzle überwucherets steils Wägli isch eus dänn doch z'gföhrlich gsi. Natürlich isch dänn au de Näbel ufgstiege und scho bald häts echli grägnet. Aber de Kafi und de Chueche wo im Billet inbegriffe gsi sind, hät eus herrlich dunkt.

Jede Abig händ mir es feins Nachtässe dörfe gnüsse. E paar Pfündli hät sicher Jedi zuegleit!!! De Musiker, wo am Abig im Hotel gspillt hät, isch sich bi eus cho bedanke, will mir mitgsunge und au no tanzet händ!! "Ich danke dem Chor der Eidgenossen!"

Am Samstig sind mir vor em Zmorge um de Wildsee gloffe, en herrliche Spaziergang und denn no bi Sunneschii ...! Am 11i isch eus de Car Chauffeur cho abhole. Ja, die schön Wuche isch verbi gsi ... D'Heireis isch über Pertisau gange, dänn die andere Schaffhuser händ ja au welle abgholt werde. Ich glaube vo Pertisau sind mir alli enttüscht gsi! Zum Glück händ mir eus für Seefeld entschiede. Im Hotel Seespitz händ sich alli sehr wohl gfühlt. De Chällner und de Gschäftsfüehrer händ sich liebevoll um eus kümmeret. De Nelly isch no de Koffer usetreit worde ...!    (Bericht Trudi Bäschlin)

Was meined ihr - wänd mir s'nächst Johr wieder nach Seefeld ???? Ich glaube - Ja!!!

zurück zur Übersicht